આ યાદીમાં ટોચનું નામ ટ્રમ્પના પ્રબળ સમર્થક ઇલોન મસ્કનું છે. મેટાના સીઇઓ માર્ક ઝુકરબર્ગ, એપલના સીઇઓ ટિમ કૂક, ગૂગલના સીઇઓ સુંદર પિચાઈ, ટેસ્લાના મસ્ક અને એમેઝોનના જેફ બેઝોસની કંપનીઓએ મળીને 1.8 લાખ કરોડ ડોલરનું નુકસાન ઉઠાવ્યું છે. આ આંકડો વર્ષના પ્રારંભને લઈને અત્યાર સુધીનો છે.

જાણકારોનું કહેવું છે કે ટ્રમ્પની રેસિપ્રોકલ ટેરિફ અને આર્થિક અનિશ્ચિતતા ટેક જગતની કમાણીમા 25 ટકાની ઘટ પાડી શકે છે.

ટ્રમ્પના પ્રબળ સમર્થક ઇલોન મસ્કને જ લઈ લો તેની સંપત્તિમાં વર્ષના પ્રારંભથી લઈ અત્યાર સુધીમાં 143 અબજ ડોલરનો ઘટાડો થયો છે. તેનું મુખ્ય કારણ ટેસ્લાના શેરમાં ઘટાડો છે. વર્ષના પ્રારંભથી ટેસ્લાના શેરમાં 28 ટકા ઘટાડો થયો છે અને બજારમૂલ્ય ઘટીને 376.6 અબજ ડોલર થઈ ગયું છે.

માર્ક ઝકરબર્ગની નેટવર્થમાં પણ વર્ષના પ્રારંભથી 26.5 અબજ ડોલરનો ઘટાડો થયો છે. જ્યારે જેફે બેઝોસની સંપત્તિ 47.2 અબજ ડોલર ઘટી ગઈ છે. જ્યારે ગૂગલની સંપત્તિ ઘટીને 368.7 અબજ ડોલર થઈ છે અને તેનો શેર 16.2 ટકા ઘટયો છે. આ ઉપરાંત એપલનો શેર 18.5 ટકા ઘટી ચૂક્યો છે અને તેનું બજારમૂલ્ય ઘટીને 684 અબજ ડોલર થયું છે.